Daxwiyanî û çalakî

RAJIN’ê Nûjiyan Erhan bi bîr anî

Koordînasyona Ragihandina Azad a Jin (RAJIN) rojnamevan û têkoşera jin Nûjiyan Erhan (Tûba Akyilmaz) di salvegera çaremîn a şehadeta wê de bi bîr anî.

Nûjiyan Erhan dema ku hêzên bi ser PDK’ê ve 3’yê Adara 2017’an êriş birin ser bajarokê Xanesorê yê Şengalê bûbû hedef û birîndar bûbû. Erhan ku ji serê xwe birîndar bûbû û rakiribûn nexweşxaneya Hesekê, di 22’yê Adara heman salî de şehîd bûbû.

Daxuyaniya Koordînasyona RAJIN’ê wiha ye:

“Em hevrêya xeta Gurbetellî Ersoz û şopînera rastiyan rêheval Nûjiyan Erhan, di salvegera 4’emîn a şehadetê de bibîrtînin. Di şexsê hevrê Nûjiyan de, şehîdên çapemeniya azad û tevahî şehîdên şoreşa civaka azad bibîrtînin. Em di şexsê hevrê Nûjiyan de soza xwe ya bicihanîna hêviyên şehîdên çapemeniya azad nû dikin. Û dibêjin wê rêya ku Nûjiyanan pejirandiye her tim di lêgerîn û vegotina rastiyan de ji bo me bibe çira.

Hevrê Nûjiyan, di tekoşîna gera li heqîqetê de, bû xwedî kedekî mezin. Di şert û mercên herî zor yê tekoşînê de cihê xwe girt. Hem xeta şoreşgeriya li Kurdistanê pejirand û hem jî bû rojnamevana demên herî zor û ya kêliyên herî dijwar yê şer. Heval Nûjiyan, di zanebûna wan kêliyên dijwar yên şer de bû. Ew zanebûna hevrê Nûjiyan, ji bîr, bawerî û armanca temsîl dikir dihat. Li çiyayê Zagrosan, li ser warê destpêkê tovên jiyanê, lê vejîn bûyî evîna xwe ya azadiyê jîndar kir û bû şopdara rastiyan.

Di rêxistinkirin, pêşxistin û mezinkirina navend û xebatên ragihandina jin, (RAJIN) de heval Nûjiyan erk û berpirsyariya pêşengiyê girte ser milê xwe. Ji bo xwe bighîne pîvanên pêşengiya hevrê Gurbet û Şîlanan kedekî bêhempa, hem ji bo xwe û hem ji bo rêhevalên xwe da pêşxistin. Em weke rêxistina ragihandina azad a jin, (RAJIN) îro bi saya keda rêhval Nûjiyan û şehîdên çapemeniya azad li her qada tekoşînê rêxistina xwe ava kiriye û saziyên xweser yê ragihandina jin pêşxistiye. Ev destkeftiyên avabûyî, bi berdêlan hatin bi destxistin. Em weke çapemeniya jin, bi biryardarî û ruhê Nûjiyanan di ber parastina van destkeftiyan de xwe erkdar dibînin. Di sedsala 21’emîn de ku li Kurdistan û Rojhilata Navîn, tekoşîna jinan ji bo hemû jinên cîhanê bûye çavkaniya hêviya jiyana azad, weke çapemeniya jin bûyîna dengê vê rastiyê erka me ya sereke ye. Em weke hevrê û şopdarên rêheval Nûjiyan, di zanebûna vê erk û berpirsyariya xwe ya dîrokî dane. Ev biryardariya me ya bi xeta rêheval Nûjiyan re ye.

Di 3’ê Tebaxa sala 2014’an de, çeteyên DAIŞ’ê, li Şengalê qirkirin û hovîtiya herî mezin ya sedsala 21’emîn pêk anîn. Îxaneta PDK’ê, reva hêzên PDK’ê ji Şengalê û reva Artêşa Îraqê rê li pêşiya kiryar û hovîtiya DAIŞ’ê ya li Şengalê vekir. Armanca sereke ya vê hovîtiya mezin tinekirina civaka me ya Êzîdî bû. Di şexsê jinên civaka me ya êzîdî de, tevahî civaka êzîdî ji holê rakirin bû. Bi sekna rêhevalên weke heval Nûjiyan, ev qirkirina hatibû plankirin negihişt armanca xwe. Heval Nûjiyan, li Şengalê çeper bi çeper, bi kameraya xwe şahidî ji fedekarî û qehremaniya gerîlayan re kir. Bi pênûsa xwe bû dengê parêzvanên gelê me yê Şengalê. Hevrê Nûjiyan, bi guhdarkirina çîroka her jinekê, bû parçeyek ji êşên wan re. Di heman demê de, weke navê xwe bû rê nîşana jiyana nû li Şengala ji DAIŞ’ê hate rizgarkirin.

Ev îxaneta PDK’ê, tenê bi sala 2014’an re sînordar nema, bi heman hişmendî û helwesta îxanetkar, di 3’ê Adara 2017’an de xwest êriş bibe ser Şengalê. Şervanên YJŞ-YBŞ’ê û Gerîla bi berxwedanê ev plangerî têk birin. Heval Nûjiyan, ji bo bibe dengê vê berxwedana dîrokî belge bike û îxaneta PDK’ê dijî ji gelê Kurd re ragihîne, hêzên PDK’ê ew bi zanebûn kirin armanca êrişan. Heval Nûjiyan, hem weke nûçegîhana şer û hem weke jineke berxwedêr xwe ji bo jin û civaka Êzîdî kir mertala parastinê. Di vê êrişa nemerdane de heval Nûjiyan bi giranî birîndar bû, di 22’ê Adara 2017’an de gihîşte şehadetê.

Gelê meyî Şengalê, di pêşengiya jinan de, îro careke din li hemberî plangeriyên qirêj û sekna îxanetkar bi ruhê Nûjiyanan û bi sedan şehîdên Şengalê li ber xwe dide. Em jî weke rêheval û şopdarên xeta Nûjiyan û Gurbetan, careke din soza xwe nû dikin em ê xeta çapemeniya azad a jin biparêzin, mezin bikin û layîqî sekna hevrê Nûjiyan bibin.”

ANHA

Related Articles

Leave a Reply

Your email address will not be published. Required fields are marked *

Back to top button